Wednesday, May 7, 2014

Wrong timing

Sama sa nanganta sa "Lupang Hinirang" sa miaging mga away ni Manny Pacquiao, daghan ang misaway sa pamaagi ni Martin Nievera pagkanta sa atong nasudnong awit atol sa away ni Pacman batok ni Ricky Hatton niadtong Domingo didto sa MGM Grand Garden Arena sa Las Vegas, Nevada.

Nagkadaiya ang reaksiyon sa mga balhiboon og dila. Apan ako na lang isentro ang akong komentaryo ngadto ni National Historical Institute (NHI) commissioner Ambeth Ocampo, nga maoy nag-una sa mga mihimo og kasikas kay lagi sayop ang pagkanta ni Martin sa Lupang Hinirang.

Argumento pang Ocampo nga sukwahi ang pagkanta ni Martin sa Lupang Hinirang segun sa nalatid sa Section 37 sa Republic Act No. 8491 nga naila sab nga 1998 Flag and Heraldic Code of the Philippines nga nagkanayon nga ang tono sa pagkanta sa nasudnong awit isubay gyud sa musical arrangement ug orihinal nga komposisyon ni Julian Felipe, sa 2/4 gibunalan sa dihang gipatokar; Ug sulod sa range nga 100 ngadto sa 120 ka metronome, sa 4/4 nga gibunalan sa pagkanta.

Sa diha nga kini madungog, tindog nga tarong, atubang sa bandila ug ibutang ang tuong kamot sa wala nga dughan samtang nag-awit.

Mahimo kining awiton sa mga seremonya sa pagpasaka sa bandila ug retreat sa mga eskwelahan ug mga opisina, internasyonal nga kompetisyon diin ang Pilipinas ang tagbalay o adunay usa ka representante; National ug local sports competitions, atol sa pagsirado ug pag-abli sa radio broadcasting ug mga istasyon sa telebisyon, pagsugod ug pagtapos sa trabaho sa mga empleyado sa mga opisina sa adlaw, sa wala pa ang una ug katapusan nga screening sa mga pelikula ug sa wala pa ang pag-abli sa mga pasundayag sa teatro; Sa ingon, nga ang mga tag-iya ug pagdumala sa mga establisamento kinahanglan mandoan sa pagpatuman sa tukma nga pag-ayo ug pagpatuman sa mga mahinungdanong probisyon niini nga buhat; Ug uban pang mga okasyon nga gitugot sa Institute.

Ang Panatang Makabayan kinahanglan nga mi-recite human sa pag-awit sa nasudnong awit sa nag-unang mga institusyon sa edukasyon.

Ang Panunumpa ng Katapatan sa Watawat ng Pilipinas mahimong mi-recite ingon man, bisan tuod ang balaod wala hingalan sa nga gikinahanglan sa pagbuhat sa ingon.

Nan karon ang akong pangutana, duna bay gihimo si Ocampo ug kaubanan nga aksiyon bisan na lang gani pahimangno ngadto sa atong mga performers nga hilig mo-usab sa tono sa atong nasudnong awit? Mao nang usahay maka-ingon ko nga maayo lang gyud ta ani sa panaway. Para nako, kay hilig man sab ko'g musika, nindot baya ang kaugalingon nga interpretasyon ni Martin sa "Lupang Hinirang." Hinuon lahi-lahi kita og opinyon. Apan ngadto sa mga hinawayon, hay mag kamo na lang kaha ang mokanta sunod kay kamo man kaha may labing nasayod sa hustong tono sa atong nasudnong awit. Aber?

* * *

Daghan ang mi-isa nga kilay ilabi na kadtong taga General Santos City sa dihang gi-announce ni Michael Buffer nga si Pacquiao taga Saranggani Province. Wala nako masurprisa pa niini kay sa dihang mibisita dinhi sa Sugbu si Pacman niadtong Sinulog, iyang giklaro kanako nga final na ang iyang desisyon nga modagan pagka-kongresista sa Saranggani sa bugnong lugaynon sunod tuig.

Apan kun atong makita ang iyang dagway, mismo si Pacman mura'g nasurprisa nga gitawag siya nga taga-Saranggani. Sayod ko sa pagkatawo ni Pacquiao ug segurado ako nga dili siya maoy nagmando niini kay sa iyang kasingkasing taga-GenSan man gyud siya. Way duda nga maniobra kini sa iyang mga alipores nga nagpalapad maayo og papel ngadto kaniya.

Maayo na lang gani kay si South Cotabato Rep. Darlene Antonino-Custodio, nga mi-knockout ni Pacman sa miaging piniliay, mapahiubsanon kaayong namahayag nga nakasabot siya sa sitwasyon kay mibalhin naman si Pacquiao og rehistrasyon pagka-botante didto sa Saranggani. Ug bisan pa man niini, si Custodio nagkanayon nga ila gihapong idolo ug giyukboan si Pacman. Apan mihirit si Custodio, nga mas maayo unta kun giapil paghisgut ang GenSan diin si Pacquiao naggagikan.

* * *

Kay naghisgut naman gyud ta'g politika, pwerting daghana sa mga politiko nga misakay sa kadaugan ni Pacman. Ang numero unong mapahimuslanon sa higayon aron palapdan ang politikanhon niyang ambisyon mao si Defense Secretary Gilbert Teodoro, nga mi-anunsiyo nang modagan pagka-presidente sa Pilipinas sa 2010 elections.

Tiaw muna samtang nag-live feed via satellite pa ang Solar Sports sa mga panghitabo didto sa MGM Grand human patikangkanga ni Pacquiao si Hatton sud lamang sa ikaduhang hugna kalit lang kining naputol dayong lugwa sa dagway ni Teodoro nga mipadangat kintahay sa iyang 'congratulatory message" ngadto ni Pacquiao.

Way dautan sa gihimo ni Teodoro, apan wrong timing kini. Dili haum sa panahon ug para nako wa siya'y delicadeza. Dili kinahanglan nga mosapaw siya sa TV coverage aron lamang ibansiwag ang iyang pahalipay sa naglagiting nga kadaugan ni Pacquiao. Hinuon kinahanglan niya nga magpabaga og nawong alang sa ilang kaayohan ug personal nga interes.

* * *

PAHIBALO. Gitawag ang tanang miyembro sa IKF/KNP/KUNTAW of the Philippines pagtambong sa seminar nga gikatakda karong Mayo 9 ug 10 gikan ala-1 hangtud sa alas-5 sa hapon diha sa University of the Visayas (UV) main. Mopasiugda sa maong seminar mao si Master Carlito G. LaƱada, Jr. Alang sa dugang pang mga detalye, niadtong interesado mahimong motawag ni Kyud Wilo Sombilon, ang club president ug regional coordinator sa IKF/KNP sa 0921-7418854. Si Julius B. Panerio sa The Freeman usa sa mga sakop sa maong kahugpongan.